Convenio Xunta

Galicia conta cunha gran diversidade de recursos xenéticos gandeiros autóctonos. A súa explotación sostible e rendible en sistemas de produción de calidade altamente compatibles co medio ambiente é posible, en gran parte, pola rusticidad e a gran capacidade adaptativa destas razas.

Na actualidade, a conservación e o fomento destas razas debe apoiarse no valor engadido que vai asociado á forma de produción característica das mesmas, cun gran aproveitamento dos recursos naturais pero sen esquecer a protección do medio ambiente. Valor engadido que se estende tamén aos produtos que se obteñen das mesmas, diferenciándoos e incrementando a súa demanda e prezo.

As actividades de recuperación e conservación deste acervo xenético, van permitir consolidar os resultados obtidos ata o de agora. Convén seguir traballando na conservación destas razas, polo que procede asinar un convenio entre a Consellería do Medio Rural e BOAGA, coas expectativas postas na recuperación e potenciación da súa variabilidade xenética, diferenciando as súas producións, contribuíndo á diversificar as actividades económicas no rural e facendo un uso comercial das razas e os seus produtos, pero sen esquecerse do mantemento da biodiversidade.

Por tanto, asumindo que a promoción de programas de conservación e fomento dos recursos zoogenéticos autóctonos de Galicia reune as condicións aludidas na lei e o regulamento de subvencións, enténdese a procedencia da firma dun novo convenio entre a Consellería do Medio Rural e BOAGA cuxo obxecto é establecer as condicións para a conservación, desenvolvemento e utilización sostible dos recursos zoogenéticos das razas bovinas autóctonas galegas en perigo de extinción, da Ovella Galega, Cabra Galega, Galiña de Mos e dos seus produtos derivados, fomentando o uso comercial destes como elemento clave para a súa conservación por parte da Federación de Razas Autóctonas de Galicia ( BOAGA).

A finalidade do convenio axústase aos fins e obxectivos de BOAGA, obxectivos compartidos coa Consellería do Medio Rural. O convenio subscríbese no marco da subintervención 65052_01 do Plan Estratéxico da PAC de España, para Galicia, sendo a intensidade da axuda do 100% dos gastos subvencionables, cofinanciado polo Fondo Europeo Agrícola de Desenvolvemento Rural (FEADER) cunha porcentaxe de financiamento do 80%, o 16% correspondería ao Ministerio de Agricultura, Pesca e Alimentación e o 4% restante á Xunta de Galicia.

O convenio estará vixente dende o 1 de setembro de 2025 ata do 31 de decembro de 2027.

BOAGA, levará a cabo actividades agrupadas nos seguintes apartados:

• Actividades relativas á conservación “in situ”/”ex situ” e tarefas de estudo.
• Actividades relativas á mellora das explotacións e das súas producións.
• Actividades relativas á promoción das razas Cachena, Caldelá, Frieiresa, Limiá, Vianesa, Ovella Galega, Cabra Galega e Galiña de Mos

PÓDESE DESCARGAR O DOCUMENTO COMPLETO NO SEGUINTE ENLACE: CONVENIO 2023-2025